Irakurle taldeak + Dastatzea + Kontzertua

2015/02/23

Atzoko egunez 1939an hil zen Antonio Machado. Gabriel Arestik 1959an Olerti aldizkarian itzuli zuen "Barteko ametsa"z oroitu ginen bereziki:

Bart, lotan, amets egin nun,

—goza amets ederrean—

iturri bat daritela ene bihotz barnean.

Ots: nundiko erretenez

zatoz, oi ur! nigana,

bizi berriko iturria,

nik edan ez dudana?

Poesia izango da aste honetako protagonistetako bat. Besteak beste, irakurle taldeen txanda izanen delako: hilean zehar liburuak hazi dira eta solasaldiaren egunean uzta jasoko dugu. Gainera aste honetan izango da Komikiak (eta euskara) hasi berrientzat taldearen lehenengo saioa.

Horrez gain Kurdistan, Hamabostaldi Libertarioaren amaiera, lurraldetasuna, ardo dastatzeak eta kontzertuak.

Komikia (eta euskara) + Irakurle Taldea + Ekonomia Kritikoa

De Rerum Natura 5 izango da Komikia (eta euskara) hasi berrientzat taldeko lehenengo liburua. German eta Luis ariko dira taldea dinamizatzen. Lagun asko aritu zarete liburua irakurtzen, espektatibak ez dira txikiak. Eta ezustekoak izango dira. Ostegunean 20etan bilera gelan ikusiko dugu elkar! Ostiralean 20etan Irakurle Taldearen txandan Maria-Merce Marçal eta Emily Dickinsonen txanda izango da. Munduko Poesia Kaieretan argitaratua Itxaro Bordak eta Angel Errok itzulitako bi poeta ezinbesteko. Gogoan izan taldeok irekiak direla eta irakurtzea aski dela bertaratzeko (martxoan Bill Bryson irakurriko dugu, adibidez). Larunbatean 12etan Ekonomia Kritikoan Joan Robinson eta José Manuel Naredoren txanda izango da.

Hamabostaldi Libertarioa

Aste honetan amaituko da Hamabostaldi Libertarioa. Hiru hitzaurre egongo dira, asteartean Emili Kortabitarte Procés Embat-i buruz, ostegunean Pepe Uruñuela errepresioaren eboluzioari buruz, ostiralean Musika interbentziorako fronteak itxiko ditu jardunaldiak. Hirurak ere 19etan.

Dastatzea: Aroa ardoa + Uxueko ogi-mamiak

Katakrakeko ardotegian Aroa Ardandegiko 3 ardo aurkeztuko dizkigu Txus Maciasek modu praktiko eta dibertigarrian. Uxueko ogi-mamiekin.
Gorde zure lekua ardotegia@katakrak.net helbidean edo deitu 948 225520ra.

Ekitaldi gehiago

"Lurraldetasunaren korapiloak" mahai ingurua antolatu du Iratzar Fundazioak. Hauek dira gonbidatuak: Emilio Majuelo (historialaria), Imanol Esnaola (Gaindegiako kidea), Eneritz Zabaleta (soziologoa) eta Floren Aoiz.
Larunbatean Jo &The Swiss Knife taldeak kontzertua eskainiko du 19etan.