Lehen amodioa izenburua duenak, Cesare Paveseren esku trebeari zor zaio, eta nahiko nabarmena da baduela kutsu autobiografikoa. Bigarrena, Sylvie, nobela labur erabat erromantikoa dugu, hitzaren berezko zentzuan, Gérard de Nervalen lan garrantzitsuenetariko bat, eragin handia izan zuena Marcel Proustengan eta bere Denbora galduaren bila erraldoiaren “madalenaren” pasarte ospetsuaren sorreran. Guy de Maupassanten Egun bat ibai ertzean ipuina da hirugarrena. Hori hartu zuen oinarritzat Jean Renoir zine-zuzendari frantsesak bere filme ederrenetariko bat egiteko, Une partie de campagne, hain zuzen ere. Eta Samuel Becketten istorio bortitza duzu, irakurle, bildumatxo honen azken narrazioa, lehen amodioaren inguruko gorabeherei erremate on bat emateko.